Sugnu carrapipanu e mi ni vantu
e mi sentu orgugliusu veramenti.
Cu si ni penti è n'omu gnuranti
e di la storia nan capisci nenti.
Cu la legge la storia la penza
comu lu grandi omu di Franciscu Lanza.
Nascìu a Carrapipi Valguarnera
e lu truvati scrittu intra li mura
unna si leggi dra beddra scrittura
di l'omu poeta di grandi cultura.
Lu grandi scritturi malandrinu
scrissi lu Corpus Domini tra li spini,
i Mimi e tanti poisii genuini:
è donu ca ci dessi lu Signuri.
E scrissi macari Lu Vindicaturi,
scrissi autri poesii popolari
chi quasi tutti ni putimu ricurdari.
C'è un menzu bustu pi monumentu
o Chian’i buceri, unna c'è a chiazza
chi é a chiù antica di Valguarnera
unna c'è a farmacia a chiù antica ca ci sia
e u palazzu du Sacru Cori
cu a Supraiura e cu diversi suori.
C'era l'albergu Raimuntu
quant'avi chi chiuvìu si pirdìu u cuntu.
L'albergu fu fattu cu tanta maistranza
e u Chian’i buceri oggi si chiama Francesco Lanza
